संवाददाता, तानाजी केदारी, महाराष्ट्र राज्य प्रमुख,
दिनांक, २६-४-२०२१.
पिंपरी चिंचवड – नाकाबंदीच्या ठिकाणी हजर होण्यास सांगितल्याने वाकडच्या पोलीस हवालदाराला उद्धटपणे बोलून भोसरी वाहतूक विभागाच्या पोलीस शिपायाने लोखंडी गजाने मारहाण केली. याबाबत भोसरी पोलीस ठाण्यात गुन्हा दाखल करण्यात आला आहे. ही घटना गुरुवारी (दिनांक,२२) रात्री साडेदहा वाजता हॅरिस ब्रिज, दापोडी येथे घडली.
किसन विठोबा गराडे (वय ५२.) असे मारहाण झालेल्या पोलीस हवालदाराचे नाव आहे. याप्रकरणी त्यांनी भोसरी पोलीस ठाण्यात फिर्याद दिली आहे. त्यानुसार पोलीस शिपाई सुरज जालिंदर पोवार, याच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, कोरोना साथीच्या पार्श्वभूमीवर पिंपरी चिंचवड पोलिसांकडून शहरात येणाऱ्या-जाणाऱ्या मार्गांवर नाकाबंदी लावण्यात आली आहे. जुना पुणे-मुंबई महामार्गावर दापोडी, येथील हॅरिस ब्रिजवरही नाकाबंदी लावण्यात आली आहे. पोलीस हवालदार गराडे हे वाकड पोलीस ठाण्यात तर पोलीस शिपाई पोवार ,भोसरी वाहतूक विभागात कार्यरत आहेत. फिर्यादी पोलीस हवालदार गराडे, आणि आरोपी पोलीस शिपाई पोवार,यांची ड्युटी गुरुवारी दिनांक, २२-४-२०२१.त्या नाकाबंदी पॉईंटवर लावण्यात आली होती.
